ब्रेकिंग

विदेश

भारत-पाकिस्तानच्या वादात पडणार नाही

Samruddhi Dhayagude
10 May 2025

अमेरिकेची भूमिका

वॉशिंग्टन : पहलगाममध्ये निष्पाप पर्यटकांना दहशतवाद्यांनी लक्ष्य करून ठार मारले. त्याचा बदला घेण्यासाठी भारताने ‘ऑपरेशन सिंदूर’ राबवत व्याप्त काश्मीर आणि पाकिस्तानातील दहशतवादी तळांवर क्षेपणास्त्र डागत जवळपास दीडशे दहशतवाद्यांचा खात्मा केला. त्यानंतर दोन्ही देशांमधील परिस्थिती चिघळली आहे. त्यावर जगाचे लक्ष्य आहे. याचदरम्यान अमेरिकेचे उपराष्ट्रपती जेडी व्हान्स यांची प्रतिक्रिया समोर आली आहे. भारत-पाकिस्तान वादात अमेरिका पडणार नाही, तसे करण्याचे काही कारण नाही, असे त्यांनी स्पष्ट केले.

व्हान्स म्हणाले, भारत-पाकिस्तान तणावात अमेरिका पडणार नाही. आम्ही भारतालाही शस्त्र टाकण्यास सांगू शकत नाही. अमेरिका ही परिस्थिती नियंत्रित करण्याच्या स्थितीत नाही, ते आमचे काम नाही. आम्ही राजनैतिक मार्गांनी या प्रकरणाचा पाठपुरावा करणार आहोत. आशा आहे की, एका व्यापक प्रादेशिक युद्धात किंवा आण्विक संघर्षात याचे रूपांतर होणार नाही. सध्या तरी आम्हाला असे वाटत नाही, असे व्हान्स यांनी सांगितले.